Xocalı soyqırımın 19-cu ildönümü İzmirdə anıldı
Heydər Əliyev Fondunun Türkiyədəki nümayəndəliyinin, İstanbuldakı Baş Konsulluğumuzun və İzmir Azərbaycan Mədəniyyət evinin təşkil etdiyi Xocalı soyqrımının 19-cu il dönümü Türkiyənin İzmir şəhərində anıldı
Tədbirdə çıxış edən Azərbaycanın İstanbuldakı Baş Konsulu Həsən Zeynalov, Heydər Əliyev Fondunun Türkiyə nümayəndəliyinin rəhbəri Samir Cəfərov Xocalı hadisələrinin Beynəlxalq hüquq tərəfindən soyqırım cinayəti aktı kimi tanınmasının hüquqi əsaslarından söz açdı. Bu hadisələrin Ermənistan Respublikasının Azərbaycana qarşı məqsədyönlü soyqırım siyasətinin bir hissəsi kimi beynəlxalq cinayət olması haqqında faktın dünya birliyinə çatdırılmasında Heydər Əliyev fondunun prezdenti Mehriban xanım Əliyevanın rəhbərliyi ilə görülən işlərdən danışdı. Bu soyqırımın günahgarlarının cəzasız qalmayacaqlarına əmin olduğunu bildirdi.
Daha sonra İzmirdə təhsil alan Azərbaycanlı tələbələrin təşkil etdiyi Xocalı soyqırımını əks etdirən tamaşa nümayiş olundu. Millət vəkili Qənirə Paşayeva İzmirin mərkəzində Xocalı soyqırımı qurbanlarının xatirəsinə abidə ucaldılmasını təklif etdi. Bildirdi ki, Isparta Bələdiyyəsinin sədri onun Xocalı soyqırımı qurbanlarının xatirəsinə abidə ucaldılması təklifini müsbət qarşılayıb və yaxın zamanlarda bu abidə qoyulacaq. Biz istərdik ki Isparta Bələdiyyəsinin bu qərarına İzmirdə qoşulsun və yaxın zamanlarda İzmirin mərkəzində Xocalı soyqırımı qurbanlarının xatirəsinə anım abidəsi qoyulsun.
İzmir şəhər Valisinin birinci müavini Mehmet Erdoğan təklifi müsbət qarşılayaraq türk dünyası ölkələrinin hər zaman birlik bərabərlik içərisində olmaqlarının vacibliyindən danışdı.
Sonda Türkiyə Millət vəkili Şenol Bal və Azərbaycan Respublikası Milli Məclisinin üzvü Elman Məmmədov çıxış edərək Xocalı soyqırımını törədənlərin öz laiqli cəzalarını ala bilməsi və dünyanın bu soyqırımı tanıması istiqamətində bütün türk dünyasını fəal iş aparmağa çağırdılar.
|