AzərTAc xəbər verir ki, bu sözləri fevralın 16-da Azərbaycanın xarici siyasət idarəsinin mətbuat katibi Elman Abdullayev demişdir.
Xarici İşlər Nazirliyinin sözçüsü vurğulamışdır ki, Azərbaycanın bu cür önəmli bir tədbirə dəvət olunması ölkəmizin beynəlxalq aləmdə əldə etdiyi növbəti böyük uğurdur. Ölkəmizin bu sammitdə iştirak etmək üçün dəvət olunması, həmçinin Azərbaycanın sürətli inkişafının, regiondakı mövqeyinin göstəricisidir.
E.Abdullayev qeyd etmişdir ki, xarici işlər nazirləri səviyyəsində keçiriləcək tədbirdə “Böyük iyirmiliyin” üzvü olan ölkələrdən başqa Avstriya, Norveç, İspaniya, Sinqapur, Birləşmiş Ərəb Əmirlikləri, Çili, Kolumbiya, Kamboca, Əlcəzair və Afrika İttifaqı təşkilatı təmsil olunacaqdır. “Böyük iyirmiliyin” üzvü olan ölkələrin builki sammitində əsasən dövlətlərin üzləşdiyi makroiqtisadi təhlükələr, iqtisadi tənəzzül, maliyyə məsələləri, ərzaq təhlükəsizliyi problemlərinin həlli müzakirə olunacaqdır. 16 fevral 2012, AzərTAC